自言自語+回憶 ◎031208◎

記得 - 細個時睇過電視做小飛俠，我每次都好專心咁睇，因為我覺得佢好叻，又識飛，但係都冇諗過要儲佢d野，事關對一個小朋友o黎講，同d同學仔玩先係最重要~

記得 - 前幾年要買小飛俠d野，真係好頭痛，差不多樣樣都係舊產品，仲要係得好少鋪頭先會有佢d野賣，自己o既朋友之中又冇人儲佢d野喎，o個時我就連電腦都未有，唔好講網頁添啦，所以形成儲小飛俠係一種好個人o既行為~

記得 - 有次o係兆萬行街，迎面而來有個女仔，佢同身邊o既男仔講:『死啦！個小飛俠好貴呀，買唔買好呀，我之前見到冇咁貴o個喎，咁點算呀~』我當時諗都唔諗就行過去，話比佢知邊度會有得平d，我見到佢面上有d微笑咁同我講唔該晒，但其實我心底係佢o既微笑二次方~

記得 - 第一件擁有o既小飛俠，就係媽媽買比我o既鎖匙扣，當時我六年級；第一件主動買o既小飛俠，就係Medicom出o既吸塑公仔，當時我中四，買o既原因係特價~

記得 - 中學時係學校長跑隊，成個訓練過程其實聚少離多，開始時大家熱下身，講少少技巧理論，跑o個時其實o係一種自我訓練，中途冇人會幫到妳，亦係我喜歡呢樣運動o既原因~

記得 - 有次o係間鋪頭見到個小飛俠公仔，想買但係冇咁做到，之後想搵番原來個街已經冇晒，o個日心情好差，自此我買小飛俠就好快有決定，係因為我唔想連決定權都冇埋~

記得 - 以前一位要好o既舊同事同我講：『你大個左一定會後悔，徙咁多錢買小飛俠~』我o個時同佢講一定唔會後悔，其實而家諗番中學時，教經濟科老師o既一番話：『我其實唔會建議妳地儲錢，因為錢唔會升值，反而會因通脹令價值下調~』

現在 - 由屋企望出街冇咩車、冇咩人，有少少風，會因為而家係零晨4點抑或係冬天？呢個就係我o既現實生活，亦係我o既人生~

-完-